تیک تاک لار
تاک تیک... تیک تاک..!
انیر ـ چیخیر
آتدیم ـ آتدیم
اؤته ـ اؤته
اؤزونو ساییر ...
تکرارلاییر ...
عقربهلر!
ـ تیک ـ تاک
ـ تیک ـ تاک
ـ تیک ـ تاک ...
اؤز باشینا دولانیر
آردیجیل پارادوکس یارادیر
هه، یوخ!
هه، یوخ!
هه، یوخ! ...
اوزولمهدن
آن ـ آن
بو تسلسلده اؤز دؤورونه دوام ائدیر
تلهسیر، تلهسمیر تیکتاکلار؛
دوردوغو یئرده ایضطیراب دوغورور
ایکی اورهکلیک یارادیر
ان، چیخ
ان، چیخ!...
آلت، اوست!
آلت، اوست!...
من، سن
من، سن!...
وار، یوخ
وار، یوخ!...
عقربهلر اؤزونو دانیر!
و یئر
ـ عقربهیه یالنیز بنزهییر ـ
آی باجیسیلا بیرگه
گونش منظومهسینین اولدوزلو خانقاهیندا
سونسوزلوغو سماع ائدیر
و بیرلیکده
دؤنور، دولانیر، فیرلانیر
و ایکی ایاقلی بیریسی
اوتوروب
گونه، آیا، ایله بؤله رک
بو اوزولمزلیگی سادالاییر
او گونشین گونده دوغولوب بوغولماغینی گؤردویو گؤزونه اینانیر
نییه کی اؤزو
بیر گون اولور
بیر گون اؤلور.
آنجاق
زامان ساعاتینین عقربهلری
بونلارا باخمادان
بیر آن یورولمادان
بیر چالیم دورمادان
ابدیّتی اولاییر.